«Астаналық сақшылар telegram арқылы есірткі сатып келген интернет-дүкеннің жолын кесті. Күдікті отбасы астана аумағында ірі көлемде ескірті сатумен айналысқан. Сақшылар әлеуметтік желіге мониторинг жасау кезінде аталған интернет-дүкенді назарына алды. Сайт әкімшісінің кім екені анықталғаннан кейін ізіне аңду қойылды. Сол арқылы қылмысқа қатысы бар басқа адамдарды анықтау көзделді», — деді Ішкі істер министрлігінің өкілі Ақтоты Боранова ведомствоның онлайн брифингінде.
Күдіктілерді ұстау операциясы бір мезетте екі мекенжайда қатар жүргізілген. Дүкен иесі синтетикалық есірткіні жасырып жатқан жерінен ұсталды. Сондай-ақ көліктен сатуға деп дайындалған мефедронның 60 орамасы табылды. Ескірткіні көзден тасалау үшін сыраның умаждалған қаңылтыр банкасына жасырып, көлікке тыққан. Дәл осы кезде пәтерде дүкен иесімен бірге тұрып жатқан әйел де ұсталған. Ол есірткі сататын сайттың әкімшісі екені белгілі болды. Мекенжайды тінту кезінде мефедронның 157 дозасы, есірткі салынған пластик науа, қарасора шайыры салынған 886 капсул табылды.
Енді сақшылар күдіктілердің басқа сыбайластарын ұстауға кірісті.
«Ерлі-зайыптыдан барлығы 3 келі мефедрон және 260 грамм қарасора шайыры тәркіленді. Осылайша елорда көшелеріне жасырылуға тиіс болған 10 мың доза есірткінің жолы кесілді. Қазіргі таңда оларға мефедрон жеткізушілердің байланыс арналары тексеріліп жатыр. Күдіктілердің үстінен ҚР Қылмыстық кодексінің 297-бабы 3 бөлігі бойынша қылмыстық іс қозғалды. Яғни, 15 жылға бас бостандығынан айырылып, мүліктері тәркіленуі мүмкін», — деді Ақтоты Боранова.
