Сот процесінде мемлекеттік айыптаушы қылмыстың қалай жасалғаны жайлы баяндама оқыды. Тергеуде анықталғандай, 2022 жылғы 14 сәуір күні сағат 21:00 шамасында 16 жастағы қыз жігітіне анасы ұрысып жатқанын айтып, жуынатын бөлмедегі бұранданы жөндеп беруін сұраған.
«Сол күні сағат шамамен 23:00-де айыпталушы жігіт сүйіктісінің үйіне барған. Жігіт су бұрандасын жөндеп жатқанда қыздың анасы ұрыс шығарған. Мас күйдегі қыздың анасы олардың қарым-қатынасын құптамайтынын жеткізген. Арадағы жанжалдың арты төбелеске ұласқан. Айыпталушы жігіт қыздың анасының қолындағы пышақты алып, жүрек тұсына бір рет соққы жасаған. Одан кейін әйелді буындыра бастаған. Әйел сонда да қарсылық білдіруге тырысқан. Ал жігіт қызынан көмектесуін сұраған. Қыз пышақты алып, бірнеше рет анасына сұғып алған. Күдіктілердің сөзіне қарағанда, әйел қыздың кішкене кезінде оған зәбір көрсеткен. Қызының соққысынан соң әйел тіл тартпай кетеді. Содан соң олар әйелдің денесін жасыруды ойлайды. 14-сәуірден 19-сәуірге дейін денені балконда сақтаған. Мәйіттен иіс шықпау үшін оған сірке суы мен сода құйып отырған», — деді сотта мемлекеттік айыптаушы.
Айыпталушылар кінәсін толық мойындаған, бірақ қылмыс топтасып жасалды деген айыпқа қарсылық білдірді.
«Кінәні мойындаймын. Қылмысты өзім жасадым. Ашу үстінде болды. Өлтіру ниетім болған жоқ. Анасы ұрысқанда қолындағы пышақты маған қарай сермеді. Қорғану үшін қолын қайырғанымда пышақ сол жақ кеудесіне кірді. Содан соң тамағынан қылқындырып, тағы үш соққы бердім. Өледі деп ойламадым. Кейін ағама хабарлап, полицияға айттық», — деп 18 жастағы жігіт кінәсін толығымен мойындады.
